Notice: Function _load_textdomain_just_in_time was called incorrectly. Translation loading for the divi-booster domain was triggered too early. This is usually an indicator for some code in the plugin or theme running too early. Translations should be loaded at the init action or later. Please see Debugging in WordPress for more information. (This message was added in version 6.7.0.) in /home/groepcoz/public_html/wp-includes/functions.php on line 6121
Self Publisering | Groep7 Drukkers

Self-publisering in 7 Stappe

In ons benadering om aan enige skrywer die geleentheid te bied om sy/haar boek self te publiseer, volg ons ‘n goed beplande 7-stap proses ten einde te verseker dat u as skrywer u doelwitte kan bereik.

Aan die regterkant sal u skakels vind wat gedurende hierdie proses ten opsigte van die 7 stappe toegepas word. Dit word hoogs aanbeveel dat voornemende skrywers die stappe in die proses bestudeer.

Skryf… ‘n storie om te geniet; die feite om te leer; die waarheid om te glo; gedagtes om te oordink; jou getuienis ter nalatenskap.

Stap 1: Skryf

Die boek is uit die aard van die saak die kern waaroor self-uitgewery gaan. Alhoewel sommige skrywers talente en gawes het, voeg dit waarde by die boek om die fynere kuns van skryf te verstaan en toe te pas. Verskeie kursusse en wenke is op die internet beskikbaar.

Lees verder

Stap 2: Teksversorging en/of Vertaling

Wees voorbereid dat hierdie stap heelwat tyd neem en kostes kan beïnvloed. Verdere waarde kan tot die boek gevoeg word om die taalversorging deur ŉ professionele taalkundige te laat doen.

Lees verder

Stap 3: Tipografiese Uitleg (Bladuitleg)

Groep 7 se span doen die uitleg van die boek in die wêreldbekende professionele program Adobe InDesign. Hierdie is ook die eerste stap na e-boeke wanneer die InDesign lêer omgeskakel word na E‑Pub vanwaar die sekure e-boek gemaak kan word.

Lees verder

STAP 4: BUITEBLAD ONTWERP

Die boekomslag bly baie belangrik aangesien dit bepalend kan wees of ŉ leser die boek gaan optel om verder ondersoek in te stel, al dan nie.

Lees verder



Stap 5: Druk en Bind

Digitale drukkers het besonder goed ontwikkel in die afgelope paar jaar en daarom kan dit koste-effektief benut word vir 1 tot 1 000 boeke per bestelling. Die voorstel is wel dat boeke eerder deurlopend gedruk word soos nodig, selfs teen slegs 10 boeke per bestelling!

Lees verder



Stap 6: Verspreiding en E-boeke

Groep 7 kan verpakking, versending en die administrasie van bestellings namens skrywers hanteer op een van die onderstaande vier wyses. ŉ Ooreenkoms moet voltooi word vir elke boek.

Lees verder



Stap 7: Bemarking

Die self-uitgewer bemark self hul boeke en e-boeke, en verskeie skrywers het reeds suksesvol die volgende metodes gebruik.

Lees verder

Beleidsdokumente

Bladsye

Kontak ons

Neem kennis: Epos of bel asb. vir 'n afspraak.

Tambotiweg 776, Kameeldrif-Oos
Roodeplaat, Pretoria

Aanwysings: Vanaf die N1, neem die Cullinan afrit, rigting na Cullinan (R513). Draai links op die R573 (KwaMahlanga/Moloto) en volg die pad vir 5 km. By “Mooipoort Golfbaan” bord, draai LINKS op die teerpad en hou reguit aan vir 3km op die grondpad. Groep 7 (wit bord) is links geleë.

epos@groep7.co.za

(verkies e-pos kommunikasie)

Skakel ons: 082 449 0574

Stap 1 – Skryf

Skryfkuns

Opstelling

Die boek word waarskynlik in Microsoft Word geskryf wat die teksversorging (editing) en proeflees daarvan vergemaklik. Hier volg ook ŉ basiese riglyn vir die volgorde van die inligting in die boek. Die voordeel van self-uitgewery bly dat die skrywer self kan besluit en dit verander. Onewe bladsynommers verskyn wel altyd aan die regterkant van ŉ oop boek (spread).

Half-titelblad/Resensies en Boekelys

Opsioneel vooraf.

Eerste Bladsy – Titelblad

Die titel van die boek en skrywer se naam verskyn hier.

Tweede Bladsy – Algemene inligting

Die woord ‘Kopiereg’ en/of die Kopiereg simbool © tesame met die uitgewer se adres en kontakbesonderhede verskyn hier. Dit bevestig dat die kopiereg van die boek die eiendom van die skrywer is.
Daarna verskyn die ISBN (opsioneel) en datum (maand en jaar) van die eerste druk en die datums van enige herdrukke.
Gee gerus ook erkenning aan persone wat die taalkundige versorging, vertaling, bladuitleg en buitebladontwerp gedoen het en in die geval van foto’s, sketse of prente gebruik, die betrokke kopiereg inligting (waar en deur wie dit geneem/geteken is of waar dit aangekoop is).
Die drukkers se naam en adres word laastens bygevoeg.

Die volgende bewoording dien as voorbeeld vir die omskrywing van die kopiereg:

“Alle regte voorbehou. Geen gedeelte van hierdie boek mag sonder skriftelike verlof van die uitgewer gereproduseer of in enige vorm of langs enige elektroniese of meganiese weg weergegee word nie, hetsy deur fotokopiëring, plaat- of bandopname, mikroverfilming of enige ander stelsel van inligtingsbewaring.”

Belangrik: Wees ingelig aangaande die riglyne oor kopiereg en beleid vir die gebruik van Bybelaanhalings van Suid-Afrikaanse Bybels. Vir meer inligting, epos copyright@biblesociety.co.za

Basiese riglyne: Die Bybelgenootskap van Suid-Afrika verleen graag toestemming aan outeurs en uitgewers om tot vyf honderd (500)* verse van die Bybel in enige formaat (geskrewe, visueel, elektronies of oudio) aan te haal. Die aangehaalde verse mag egter nie meer as vyftig persent (50%)* van ŉ volledige boek van die Bybel, of meer as vyf en twintig persent (25%)* van die totale teks van die werk waarin hulle aangehaal word, uitmaak nie, anders moet voorafgaande skriftelike toestemming verkry word.

Erkenning van kopiereg voorbeeld: “© Aanhalings uit die Bybel in (taal, datum, uitgawe) – met verlof van die Bybelgenootskap van Suid-Afrika.”

*Spesifikasies kan verskil tussen die verskillende vertalings.

ISBN: Registrasie en administrasie namens die skrywer - R200. Digbundels en boeke vir beperkte mark benodig nie ISBN nie. Indien verlang, epos versoek aan marietjie.debeer@nlsa.ac.za om self aansoek te doen.

Derde Bladsy – Opgedra (oop agterkant)

Spesiale inligting word hier geplaas bv. indien die boek opgedra word aan ŉ persoon wat die inspirasie tot die skryf van die boek was.

Vierde Bladsy – Inhoudsopgawe

ŉ Inhoudsopgawe word gewoonlik slegs in nie-fiksiewerk gebruik wat dele en hoofstukke bevat. ŉ Inhoudsopgawe is minder algemeen in fiksiewerk, maar kan gebruik word in kortverhale of as die werk unieke hoofstuktitels bevat. Dit word nie gebruik as hoofstukke slegs genommer is nie.

Erkenningsblad

Erkenning word hier aan enigeen gegee wat behulpsaam was, inset gelewer het, of jou ondersteun en gemotiveer het met die skryf van jou boek.

Voorwoord en/of Inleiding

Die voorwoord of inleiding kan geskryf word om die agtergrond te skets wat aanleiding gegee het tot die publikasie van die boek en om meer van die boek te verduidelik.

Die voorwoord kan ook die skrywe van ander (dalk bekende) persone wees wat reeds jou boek gelees het.

Inhoud van Boek – Hoofstukke

Die inhoud van die boek kom na die Voorwoord, Inleiding, ens. en die eerste hoofstuk begin gewoonlik op ŉ onewe bladsy.

Laaste Bladsye

Resensies, Boekelys (opsioneel vooraf), Bibliografie, Outeur se profiel, Indeks en Bylae.

Stap 2 – Teksversorging en/of Vertaling

Teksversorging

Wees voorbereid dat hierdie stap heelwat tyd neem en kostes kan beïnvloed. Verdere waarde kan tot die boek gevoeg word om die taalversorging deur ŉ professionele taalkundige te laat doen.

Neem asb. die volgende in ag wanneer ‘n taalkundige gekontrakteer word. Omvattende taalkundige versorging kan basies soos volg verduidelik word:

Substantiewe redigering (copy-editing): Die teksversorger (copy-editor) is gekwalifiseer om die taalnorme op die hele spektrum van taalgebruik van toepassing te maak. Dit behels basiese redigering sowel as: sintaksis, semantiek, pragmatika, skryfstyl, rekenkunde, posisies van tabelle en illustrasies, dubbel-sinnigheid, teenstrydighede, verwysings, voetnotas en selfs regs-probleme soos laster en plagiaat.
Teksredigering (proof-editing): is taalremediëring wat beteken die korrigering van sintaktiese foute, foutiewe leesteken gebruik, grammatika, taalgebruik en spelling.
Proeflees: Nadat die bladuitleg gedoen is word die PDF dokument of die proefboek aan die proefleser (proofreader) gestuur om dit finaal te kontroleer vir enige taalkundige- of bladuitleg foute wat nie deur die teksversorgers opgetel is nie.

Kontak Groep 7 gerus vir verwysing na kundiges of vind die regte persoon vir jou boek deur persoonlike verwysing van vriende of die internet, bv. www.editors.org.za vir redigering, substansiële taalkundige versorging, en vertaling of www.savryskutskrywer.co.za vir basiese redigering.

Die kundiges wat deel van Groep 7 se span is, hanteer dit soos volg:

Basiese evaluasie van die boek met ŉ verslag sodat skrywers ŉ ingeligte besluit kan neem oor taalkundige versorging – R350.
'n Kwotasie word gegee volgens die aantal woorde en die omvang van die taalkundige versorging benodig. Die kostes per woord beloop ongeveer:
- - Substantiewe redigering (copy-editor): 14c–22c p/w;
  - Teks redigering (proof-editing): 10c–14c p/w;
  - Proeflees: 6c–10c p/w.

Proses:

Met aanvaarding van die kwotasie word ŉ gedeelte van die eerste hoofstuk se taalversorging gedoen en voorgestelde veranderinge uitgewys.
Taalversorging word gedoen met ‘track changes’. Die keuse lê steeds by die skrywer of sy/hy die voorgestelde veranderinge wil aanbring, al dan nie. Die skrywer hoef dus nie bekommerd te wees dat die taalversorger die boek gaan herskryf nie! Dit gee ook geleentheid om te bepaal of skrywer en taalkundige goed gaan saamwerk.
Daarna word die aanvaarding van die kwotasie herbevestig, en taalversorging word deurlopend in ‘track changes’ formaat aan die skrywer gestuur vir aanvaarding en/of alternatiewe voorstelle. Betaling geskied dan ook vir werk tot op sekere vlakke voltooi, bv. 25%, 50%, 75% en 100%, afhangend wat die outeur en taalversorger oorgekom het.

Vertaling

Indien die skrywer ŉ behoefte het om ŉ ander teikengroep (m.a.w. taalgroep – Afrikaans, Engels of Afrikatale) te bereik, word die boek in MS Word aan ŉ vertaler gestuur. Groep 7 se kundiges sal graag ook daarop kwoteer.

Die proses is basies dieselfde as tydens dié van redigering:

ŉ Paar bladsye word vertaal sodat die skrywer die “gevoel” kan kry van die vertaler se werk.
ŉ Kwotasie word deur die vertaler uitgewerk. Skrywers kan vertaalkostes verwag vanaf 28c per woord – afhangende van die taal kwaliteit en ingewikkeldheid van die boek.
Die vertaler stuur die hoofstukke soos wat dit voltooi word terug na die skrywer vir goedkeuring.
Die vertaler word betaal soos wat die werk voltooi word, bv. hoofstuk-vir-hoofstuk, of 25%, 50%, 75% en 100%, afhangende wat die outeur en taalversorger ooreengekom het.

Stap 3 – Tipografiese Uitleg (Bladuitleg)

Die bladuitleg en buitebladontwerp kan gedoen word deur:

Groep 7 se professionele personeel;
die skrywer self;
of enige grafiese kunstenaar van die skrywer se keuse.

Die tipe drukproses wat gebruik gaan word, bepaal dan ook hoe die uitleg gedoen word. Riglyne van kostes vir bladuitleg in Adobe InDesign is:

A5 boeke – vanaf R9 tot R16 per bladsy.
A4 boeke – vanaf R12 tot R22 per bladsy.
Boeke met sketse, fotos & diagramme – vanaf R 25 per bladsy.
Boeke wat ook ŉ indeks benodig – vanaf R 65 per bladsy.
Regstellings na bladuitleg – R120 per uur.
Indien skrywers verkies om die dokument in MSWord te behou en self regstellings te maak, doen ons afronding vanaf R4.50 per bladsy.

Die kwotasie word voorsien wanneer die manuskrip ontvang is en twee fakture word gelewer vir betaling nadat 50% en 100% van die werk voltooi is.

Groep 7 se grafiese kunstenaars doen professionele bladuitleg, maar dit sluit nie uit dat jy (of jou vriend!) dit kan doen en die dokument in drukgereed kwaliteit PDF (portable document format) aan ons voorsien sonder enige uitlegkoste daaraan verbonde nie. 'n Proefboek word deur Groep 7 gedruk en die outeur moet dit goedkeur alvorens die druk van die boeke kan begin.

Indien jy, of ŉ grafiese kunstenaar van jou keuse, self die bladuitleg doen, hou die volgende paar riglyne in gedagte vir ŉ netjiese uitleg:

Die bladsye in ŉ A5 boek is 148,5 mm breed en 210 mm lank met 15-20 mm spasie tussen die inhoud en die vier kante van die bladsy.
ŉ A4 bladsy is 210 mm breed en 297 mm lank met dieselfde kantruimtes.
Lettertipe wat normaalweg gebruik word, is “Serif” wat beteken die lettertipe het kop- en voetstukkies wat lees kan vergemaklik. “Sans serif” beteken dus sonder die kop- en voetstukkies wat wel vir opskrifte gebruik kan word. Oorweeg dus lettertipes soos: Century Schoolbook;Baskerville; Garamond; of Goudy Old Style.
Nommering van die bladsye tot voor die eerste hoofstuk word normaalweg in Romeinse syfers gedoen en daarna begin Hoofstuk 1 op bladsy 1. Onewe nommers is aan die regterkant. Wanneer ŉ boek uit 100 bladsye bestaan, beteken dit dat 50 blaaie weerskante gedruk en genommer word, bv. Romeinse syfers i-iv genommer en die res van die boek 1-96 genommer.

Stap 4 – Buiteblad Ontwerp

Die boekomslag bly baie belangrik aangesien dit bepalend kan wees of ŉ leser die boek gaan optel om verdere ondersoek in te stel, al dan nie.

Groep 7 se grafiese kunstenaars gebruik Photoshop of CorelDraw en het die kennis en ondervinding om jou droomomslag die lig te laat sien! Die kostes verbonde wissel tussen R600 en R950 en word bepaal deur inligting wat deur die skrywer voorsien word en tyd gespandeer. Vervolgens kan dit nodig wees om foto’s of grafiese prente met kopiereg aan te koop wat die skrywer toestemming gee om dit te mag gebruik (R250).

Jy is egter meer as welkom om jou eie omslag te ontwerp en die dokument in druk kwaliteit PDF (portable document format) aan ons te voorsien sonder enige uitlegkoste daaraan verbonde.

Maak asb. seker dat jy kopiereg op foto’s, clipart ens. het.

Die volgende kan as riglyne dien:

Die voorkant, rugkant en agterblad word as ŉ geheel ontwerp.
Die grootte vir ŉ A5 boek is dubbel A5 (dus A4 landscape) plus rugkant plus 3 mm ‘bleed’ (bv. ŉ A5 boek met 100 bladsye is die rugkant 6 mm, en sal die finale ontwerp 216 mm by 309 mm wees).
Die grootte vir ŉ A4 boek is dubbel A4 (dus A3 landscape) plus rugkant, plus 3 mm ‘bleed’ ( ŉ A4 boek met 200 bl is die rugkant 12 mm en sal die finale ontwerp 303 mm by 438 mm wees).
Belangrike riglyn om dit visueel goed te laat vertoon, is om alle geskrewe dele en foto’s 15–20 mm vanaf alle kantlyne te plaas.
Ontwerp asb in CMYK oftewel “Cyan, Magenta, Yellow and Key Black”.
Die boek word na bind, 3 mm op die 3 kante gesny.

Stap 5 – Druk en Bind

Digitale drukkers het besonder goed ontwikkel in die afgelope paar jaar en daarom kan dit koste-effektief benut word vir 2 tot 1 000 boeke per bestelling. Die voorstel is wel dat boeke eerder deurlopend gedruk word soos nodig, selfs teen slegs 10 boeke per bestelling!

Ten minste een proefboek word gedruk en deur die outeur goedgekeur alvorens die bestelling uitgevoer word.

Groter bestellings (>1 000) word litografies gedruk wat beteken dat die eenheidskoste wel verminder, maar die totale kapitaaluitleg baie kan wees.

Buiteblad

Die buiteblad word volkleur of swart gedruk op 250 g/m² tot 300 g/m² geseëlde (coated) karton en glans/mat gelamineer ter beskerming.

Inhoud

Verskillende papier kan gebruik word en ons hou 80g wit bond en off-white Bookpaper in voorraad. Boeke kan óf in swart, óf in volkleur, óf in ŉ kombinasie van swart en volkleur gedruk word om kostes te bespaar indien elke bladsye nie volkleur is nie.

Indien ŉ kombinasie van swart- en kleurblaaie gedruk word, is dit belangrik dat daar reeds met die uitlegproses bepaal word watter foto’s in kleur gedruk moet word. Een blaai (voor- en agterkant) word of deur die kleurdrukker of deur die swartdrukker gedruk en daarna ingesorteer om die finale boek te vorm. Indien ŉ voorkant kleur en ŉ agterkant swart behels, word die blaai steeds deur die kleurdrukker gedruk en beide as kleur gefaktureer.

Bindmetodes

Perfect bind (60-700 bladsye): Hierdie is die normale bindproses vir boeke en word met warm gom in die buiteblad gebind en vorm ŉ hoekige rugkant.
Saalkram (8-60 bladsye): A4 boeke word op A3 gedruk, gevou en op die vou met 2 kramme aan die buiteblad vasgekram. Op dieselfde wyse word A5 boeke op A4 papier gedruk, gevou en gekram. Die voordeel is dat die boek plat lê wanneer dit oopvou.
Draad ringbind (10-500 bladsye): Enige hoeveelheid bladsye kan so gebind word en die blaaie kan dus heeltemal omvou. Dit is ideaal vir opleidingsmateriaal en werkboeke.
Hardebandboeke (60-700 bladsye): Die boek word onafhanklik gebind en gesny. Die hardeband word met die volkleur papier oorgetrek, waarna die boek in die omslag ingebind word. Die eenheidskoste, bykomend tot die normale drukkoste per boek, bly dieselfde ongeag die hoeveelheid boeke. Vir A5 boeke is dit R115 en A4 boeke R145 bykomend.

Drukkostes

Basiese spesifikasie met volkleur 300g buiteblad gelamineer en inhoud laser swart gedruk op 80g bond en Perfect Bind. ŉ Proefboek word gedruk en die outeur moet dit goedkeur voor ons die boeke begin druk.

Proefboek en eenheidspryse (voorbeeld):

A5 boek met bv. 160 bladsye R53
A4 boek met bv. 160 bladsye R87

Drukkostes vir bestellings na proefboek goedgekeur is:

2-48 boeke = eenheidsprys van proefboek
Korting op:
- - 50 boeke 5,0% 100 boeke 7,5%
  - 250 boeke 12,5% 500 boeke 15,0%
  - 750 boeke 17,5% 1,000 boeke 20,0%

Stap 6 – Verspreiding en E-boeke

Groep 7 kan verpakking, versending en die administrasie van bestellings namens skrywers hanteer op een van die onderstaande vier wyses. ŉ Ooreenkoms moet voltooi word vir elke boek.

Die voordeel is dat skrywers nie vooruit betaal vir enige boeke wat so bestel word nie en administrasiekoste word so laag as moontlik gehou om die geleentheid aan skrywers te gee om hul boeke teen mededingende pryse in die mark te plaas.

Rekonsiliasie van verkope word elke drie maande gedoen (Februarie, Mei, Augustus en November), die netto inkomste word bereken en betaal aan die outeurs.

Skrywers verkope (gedrukte boeke)

Die skrywer voorsien name en adresse waarheen boeke versend moet word. Groep 7 druk en versend die boeke en faktureer die skrywer met druk- en koerierkoste.

Webwerf Boekwinkel (gedrukte boeke)

Plasing op Groep 7 se boekwinkel webwerf, Groep 7 eWinkel teen ŉ eenmalige koste van R250 (BTW ingesluit).

Die skrywer bepaal verkoopprys.
Individuele kopers bestel en betaal boeke aanlyn.
Groep 7 druk en versend boeke.

Die berekening van die netto inkomste vir die skrywer is soos volg:

Verkoopprys min
- - 20% (15% BTW wat Groep 7 aan SARS betaal, en 5% vir Payfast koste (kredietkaart);
  - Drukkoste van boek.

Boekwinkels (gedrukte boeke – voorwaardes geld)

Wanneer boekwinkels navraag doen om aankoop van skrywers se boeke, verloop die proses soos volg:

Skrywers bepaal die verkoopprys.
Groep 7 druk en versend boeke, faktureer boekwinkels en hanteer die administrasie daarvan.

Die berekening van die netto inkomste vir die skrywer is soos volg:

Verkoopprys min
- - 50% wat die boekwinkel neem;
  - 15% BTW wat Groep 7 aan SARS betaal;
  - drukkoste van boek.

Elektroniese boeke (e-boeke)

Groep 7 kwoteer op elke individuele boek om dit gereed te kry vir publisering in e-boek formaat.

Die bladuitleg word in Indesign gedoen en daarna oorgeskakel na E-Pub.
Die ISBN word in die skrywer se naam geregistreer en al die nodige inligting op Kobo se webwerf (www.kobo.com) gelaai wat dit omskakel na ‘n sekure E-Boek.
Hierdie dokumente kan skrywers ook ter enige tyd gebruik om dit op enige ander platform te publiseer.
Die link word aan die skrywer gestuur en skrywers kan hul bemarking uitbrei vir wêreldwye verkope.
Die link word ook op Groep 7 se webwerfboekwinkel geplaas langs die skrywer se boek.
Die skrywer bepaal die verkoopprys en ontvang 50%.
Amazon.com - voorbereiding van dokumente sodat die skrywer self daar kan publiseer.

Stap 7 – Bemarking

Die self-uitgewer bemark self hul boeke en e-boeke, en verskeie skrywers het reeds suksesvol die volgende metodes gebruik by:

Tersiêre instellings, skole en preprimêre skole waar die behoeftes reeds bestaan.
Kinderhuise of dergelike instellings met ŉ groot databasis.
Ooreenkomste met boekwinkels, Amazon en Kobo.
Bemarking via e-pos, Facebook en ander kommunikasiekanale waar die doelmark reeds geïdentifiseer is.
Seminare en werkswinkels.
Skrywers-webwerwe.

Groep 7 kan die volgende doen ter ondersteuning, en kwotasies lewer op enige van die volgende:

Beskikbaarstelling (per ooreenkoms):
- - Groep 7 se aanlyn-boekwinkel;
  - E-boeke op Kobo
  - Boekwinkels (onderworpe aan voorwaardes). Groep 7 is ŉ geregistreerde verskaffer aan o.a. Exclusive Books, Bargain Books, Protea, PNA en ander boekwinkels (dit is hulle besluit om te bestel);
Skrywer se profiel op Groep 7 se webwerf;
Plakkate (gedrukte en elektroniese formaat) vir bv. boekbekendstellings.
Amazon.com - voorbereiding van dokumente sodat die skrywer self daar kan publiseer.